Muzeu i Suharekës është ndërtuar në vitin 1928, në kohën e Mbreterise Serbo-Kroate-Sllovene (SKS). Në fillimet e para kishte shërbyer si shkollë e ciklit të ulët katër vjeçare, ku mësimi ishte zhvilluar në gjuhën serbe. Si e tillë kishte funksionuar deri në Luftën e Dytë Botërore. Gjatë viteve 1941-1945, për shkak të rrethanave të luftës thuhet se e ka pushuar aktivitetin mësimor. Pas përfundimit të luftës ishte aktivizuar prapë por që tani mësimi zhvillohej në gjuhën shqipe. Kështu kjo shkollë me këtë hapësirë që ka edhe sot ka funksionuar deri në vitin 1960. Më pas afër saj është ndërtuar edhe një pjesë tjetër e shkollës, pasi që nuk kishte mundësi t’i plotësonte nevojat e numrit të madh të nxënësëve si dhe zhvillimit të ciklit më të lartë atë tetë vjeçar. Kjo shkollë fillore rrugëtimin e vet e kishte vazhduar edhe në vitet pasuese duke u rritur edhe më shumë. Gjatë viteve 2006-2007 shkolla përfundoi krejtësisht aktivitetin e saj në këtë objekt. Kjo ndodhi sepse afër tij u ndërtua një objekt tjetër me kushte më të favorshme për të zhvilluar mësimin. Shkolla në fjalë mban emrin “7 Marsi”, siç e ka pasur edhe më herët kur gjendeshin në objektin e parë. Duhet thekësuar se ky institucion arsimor ishte dalluar në dhënien e rezultateve të mira në kuadër të komunës. Pasi që aty kanë dalur dhjetëra kuadra të cilët më pas ishin pjesë e institucioneve të vendit. Prej këtyre viteve pra 2006-2007 deri në vitin 2012 objekti kishte mbetur i boshatisur dhe në prag të shkatërrimit. Paraprakisht në vitin 2001 një grup profesorësh nga lëmia e historisë kishin marrur iniciativë për themelimin e një muzeu në qytetin e Suharekës. Ata ishin: prof.Dr. Jusuf Osmani, mr.Zelije Shala, Nazif Demiraj si dhe shumë të tjerë pas tyre. Në bashkëbisedim me qeverisjen komunale të kohës ku kryetar i saj ishte Ukë Bytyçi morën përkrahje për ta mbështetur një ide të tillë. Në anën tjetër ata kishin arritur të vëjnë kontakte me një nga biznesët më në emër në Suharekë “Hidroterm” që e ka pronar Blerim Kuçin. Ky si dashamirës i trashëgimisë kulturore kishte shprehur dëshirën për ta mbështetur një ide të tillë me mjete materiale për ndërtimin e objektit në rastin e caktimit të lokacionit. Për shkak të mos gjetjes së lokacionit të përshtatshëm kjo ide për momentin pushoi por asesi nuk u lë në harresë. Në vitin 2009, në zgjedhjet lokale në Suharekë, Blerim Kuçi zgjedhet kryetar i komunës dhe gjatë qeverisjes së tij ai e ringrit çështjen e muzeut. Së bashku edhe me persona të tjerë vendosin për themelimin e muzeut të qytetit. Në këtë kohë një delegacion nga vendi i Suedisë e cila ishte Organizata suedeze për trashëgiminë kulturore pakufinj (CHwB) i bën vizitë objektit të shkollës të lënë në gjendje të mjerueshme. Përmes tyre lind ideja se ky objekti që kishte shërbyer si institucion arsimor mund të rindërtohet, rinovohet dhe shndërrohet në muze. Pëlqimi veçse ishte marrur nga strukturat komunale dhe gjithashtu ishte hapur tenderi për rregullimin e tij. Pasi përfunduan punimet u cilësua objekt i përshtatshëm për tu destinuar në formë muzeu. Nga viti 2012 filloi të funksionojë si i tillë, me emrin “Muzeu Edukativ”. Prej asaj kohe deri në verë të vitit 2019 drejtor i muzeut ishte Demir Zekolli, tani më ai gjendet në pension. Kurse nga tetori i vitit 2019 në këtë institucion u emërua drejtor Nazif Demiraj.